បាត់ដំបង៖ ឯកឧត្តម អ៊ុយ រី ប្រធានក្រុមប្រឹក្សាខេត្តបាត់ដំបង ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង និងលោកជំទាវ ម៉េត រ៉ាវីចិត្រ សុខ លូ ព្រមទាំងលោកជំទាវ កាំង ណៃគួយ ស រដ្ឋា រួមជាមួយមន្រ្តីរាជការក្នុងខេត្តបានអញ្ជើញចូលរួមពីធីកាន់បិណ្ឌ បុណ្យភ្ជុំបិណ្ឌវេនទី១១ ប្រគេនជូនវត្តចំនួន១៥ ក្នុងខេត្តបាត់ដំបង ដែលប្រព្រឹត្តទៅនារសៀលថ្ងៃទី០៦ ខែតុលា ឆ្នាំ២០២៦ នៅវត្តពោធិ៍វាល ស្ថិតក្នុងសង្កាត់រតនៈ ក្រុងបាត់ដំបង។

បាត់ដំបងៈ ព្រះចៅអធិការ និងគណៈកម្មការអាចារ្យ ព្រមទាំងពុទ្ធបរិស័ទ វត្តសរភ្យារាម ហៅវត្តសូភី តែងតែរៀបចំបុណ្យកាន់បិណ្ឌ និងភ្ជុំបិណ្ឌ ជារៀងរាល់ឆ្នាំ ក្នុងការថែរក្សា នូវព្រះពុទ្ធសាសនាឱ្យបានភ្ជាប់ខ្ជួន ទៅតាមគន្លងប្រពៃណីខ្មែរ។ វត្តសរភ្យារាម ហៅវត្តសូភី មានទីតាំងស្ថិតនៅក្នុងភូមិសូភី១ សង្កាត់រតនៈ ក្រុងបាត់ដំបង វត្តសរភ្យារាម ហៅវត្តសូភី នាព្រឹកថ្ងៃទី០២ ខែតុលា ឆ្នាំ២០២៦ ត្រូវនឹងវេនទី៦ មានពុទ្ធបរិស័ទមកចូលរួមកម្មវិធីបុណ្យជាហូរហែរ ដោយបាននាំយកនូវទេយ្យវត្ថុ និងបច្ច័យមួយចំនួនយកមកប្រគេនដល់ព្រះសង្ឃ នឹងសូមឧទ្ទិសបួងសួងទៅដល់ញាតិការទាំងប្រាំពីសន្តាន ដែលបានចែកឋានទៅហើយសូមមកទទួលនូវផល្លាអានិសង្ឃនេះកុំបីអាក់ខានឡើយ។

បាត់ដំបង៖ ពុទ្ធបរិស័ទខេត្តបាត់ដំបង ដែលមានជំនឿគោរពតាមទំនៀមទម្លាប់ប្រពៃណី បានជួបជុំគ្នា រៀបចំកាន់វេនដាក់បិណ្ឌតាមវត្តអារាមនានា ដើម្បីរំលឹកនឹកគុណ និងឧទ្ទិសកុសលជូនដល់បុព្វការីជន មានមាតាបិតា និងវីរយុទ្ធជនពលីដែលបានចែកឋានទៅ ព្រមទាំងថែរក្សាទំនៀមទម្លាប់ប្រពៃណីខ្មែរដែលមានតាំងពីបុរាណកាល។

បាត់ដំបង៖ សិល្បការិនីជំនាន់ដើមចំនួន៣រូប រួមមានរូបសំណាកលោកស្រី រស់ សេរីសុទ្ធា, លោកស្រី ប៉ែន រ៉ន និងលោកស្រី ហួយ មាស ត្រូវបានធ្វើពិធីបើកស្បៃដាក់បង្ហាញដល់សាធារណៈជន នារសៀលថ្ងៃទី១៣ ខែកញ្ញា ឆ្នាំ២០២៦ នៅបរិវេណសួនសិល្បៈ ក្រុងបាត់ដំបង ក្នុងការលើកតម្កើងនូវស្នាដៃ និងតម្លៃសិល្បៈខ្មែរកាន់តែលេចធ្លោថែមទៀត សម្រាប់ខេត្តបាត់ដំបង ដោយមានការអញ្ជើញជាអធិបតីភាព ពីឯកឧត្តម សុខ លូ អភិបាលនៃគណៈអភិបាលខេត្តបាត់ដំបង និងលោក លោកស្រី ប្រធាន អនុប្រធានមន្ទីរនានាក្នុងខេត្ត ព្រមទាំងប្រជាពលរដ្ឋយ៉ាងច្រើនកុះករ។

បាត់ដំបង៖ ឯកឧត្តម សុខ លូ អភិបាលខេត្តបាត់ដំបង បានដឹកនាំសហការីចូលរួមគោរពវិញ្ញាណក្ខន្ធ ឧបាសិកា រស់ សាបឿន បងស្រីបង្កើតរបស់លោកស្រី រស់ សេរីសុទ្ធា ដែលបានទទួលមរណភាពដោយជរាពាធ ក្នុងជន្មាយុ ៨៨ ឆ្នាំ។ ពិធីបុណ្យសពបានប្រារព្ធនៅវត្តស្វេតកុញ្ជរជ័យ (វត្តដំរីស) កាលពីថ្ងៃទី ២០ សីហា ២០២៦។

បាត់ដំបង៖ លោក មូល ធន អភិបាលរងខេត្តបាត់ដំបង តំណាងដ៏ខ្ពង់ខ្ពស់ ឯកឧត្តម សុខ លូ អភិបាលនៃគណៈអភិបាលខេត្តបាត់ដំបង កាលពីថ្ងៃទី២៨ ខែកក្កដា ឆ្នាំ២០២៦ បានដឹកនាំប្រតិភូមន្ត្រីរាជការនៃមន្ទីរ-អង្គភាពជុំវិញខេត្ត ដែលទទួលបន្ទុកចុះជួយសង្កាត់អូរម៉ាល់ បាននាំយកទៀនវស្សា និងទេយ្យវត្ថុ ទៅប្រគេនព្រះសង្ឃដែលគង់ចាំវស្សាអស់ត្រីមាស នៅវត្តរកា ស្ថិតក្នុងសង្កាត់អូរម៉ាល់ ក្រុងបាត់ដំបង ខេត្តបាត់ដំបង។