បន្ទាយមានជ័យ៖ នៅព្រឹកថ្ងៃចន្ទ ទី៥ ខែតុលា ឆ្នាំ២០២៦ លោក ខុន សុខុម ប្រធានមន្ទីរអធិការកិច្ចខេត្តបន្ទាយមានជ័យ និងជាតំណាង ឯកឧត្ដម លីវ សុភក្ត្រា រដ្ឋលេខាធិការក្រសួងអធិការកិច្ច និងជាសមាជិកក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ បាននាំយកអំណោយអង្ករចំនួន ៣តោន ប្រគល់ជូនដល់រដ្ឋបាលក្រុងប៉ោយប៉ែត សម្រាប់ចាត់ចែងបន្តផ្តល់ជូនប្រជាពលរដ្ឋដែលកំពុងទទួលរងផលប៉ះពាល់ដោយសារគ្រោះទឹកជំនន់នៅក្នុងមូលដ្ឋាន

នៅថ្ងៃទី៥ ខែតុលា ឆ្នាំ២០២៦ លោកបណ្ឌិត សេង វ៉ាង ប្រធានការងារចុះជួយមូលដ្ឋានឃុំរហាល និងក្រុមការងារ បាននាំយកទឹកសុទ្ធចំនួន ២០០យួរ ឧបត្ថម្ភជូនដល់កងទ័ពជួរមុខប្រចាំទិសបឹងត្រកួន ដើម្បីប្រើប្រាស់តាមតម្រូវការជាក់ស្តែង។

នៅព្រឹកថ្ងៃទី៥ ខែតុលា ឆ្នាំ២០២៦ ក្រោមការយកចិត្តទុកដាក់របស់ លោក កែ សួន សុភាព ប្រធានសហភាពសហព័ន្ធយុវជនកម្ពុជាខេត្តបន្ទាយមានជ័យ និង លោកស្រី ព្រហ្ម រដ្ឋា ស.ស.យ.ក. ស្រុកម៉ាឡៃ បានចុះសួរសុខទុក្ខ និងនាំយកអំណោយជាគ្រឿងឧបភោគ-បរិភោគ ប្រគល់ជូនប្រជាពលរដ្ឋចំនួន ២២គ្រួសារ ដែលរងផលប៉ះពាល់ដោយសារទឹកជំនន់ និងកំពុងជួបការខ្វះខាតក្នុងជីវភាព ស្ថិតនៅឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ។

នៅព្រឹកថ្ងៃចន្ទ ៩រោច ខែភទ្របទ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៥ ខែតុលា ឆ្នាំ២០២៦ សភាពាណិជ្ជកម្មខេត្តបន្ទាយមានជ័យ ដឹកនាំដោយ ឧកញ៉ា អ៉ឹង វណ្ណម៉ៅ អនុប្រធានសភាពាណិជ្ជកម្មកម្ពុជា និងជាប្រធានសភាពាណិជ្ជកម្មខេត្ត បាននាំយកគ្រឿងឧបភោគបរិភោគ និងថវិកា ជូនដល់ស្នងការដ្ឋាននគរបាលខេត្តបន្ទាយមានជ័យ ដើម្បីចូលរួមចំណែកគាំទ្រដល់ការងារ និងសកម្មភាពរបស់កងកម្លាំងនគរបាលក្នុងមូលដ្ឋាន។

លោកឧត្តមសេនីយ៍ត្រី សឿម សារិទ្ធិ ស្នងការនគរបាល ខេត្តបន្ទាយមានជ័យ នៅថ្ងៃទី៣០ ខែកញ្ញា ឆ្នាំ២០២៦ បានដឹកនាំប្រតិភូ ចុះសួរសុខទុក្ខ និងនាំយកគ្រឿងឧបភោគ បរិភោគ ទៅចែកជូនកងកម្លាំង នគរបាលការពារព្រំដែនគោក ដែលកំពុងឈរជើងបំពេញ បេសកកម្មយ៉ាងសកម្ម តាមភូមិសាស្ត្ររបស់ខ្លួនគ្រប់គ្រង ក្នុងស្ថានភាព ដែលទឹកជំនន់កំពុងជន់លិចយ៉ាងធ្ងន់ធ្ងរ។

នៅព្រឹកថ្ងៃទី៣០ ខែកញ្ញា ឆ្នាំ២០២៦ លោក កែវ តារារស្មី អភិបាល នៃគណៈអភិបាលស្រុកមង្គលបូរី បានដឹកនាំក្រុមការងារ ចុះពិនិត្យស្ថានភាពទឹកជំនន់ និងស្ថានភាពជាក់ស្តែងនៅក្នុងភូមិសាស្ត្រឃុំរហាត់ទឹក ស្រុកមង្គលបូរី ខេត្តបន្ទាយមានជ័យ។