រដ្ឋបាលខេត្ត និងមន្ទីរបរិស្ថានខេត្តប៉ៃលិន រៀបចំសិក្ខាសាលាតម្រង់ទិស ជ្រើសរើសសិក្ខាកាមវគ្គ «បដិសណ្ឋារកិច្ចបៃតង» និងបេក្ខភាពប្រឡងប្រណាំងពានរង្វាន់សហគ្រាសបៃតង

(ប៉ៃលិន)៖ កាលពីថ្ងៃទី១៦ ខែតុលា ឆ្នាំ២០២៦ នៅសាលប្រជុំភ្នំខៀវ នៃមន្ទីរបរិស្ថានខេត្តប៉ៃលិន មានរៀបចំសិក្ខាសាលាពិគ្រោះយោបល់ និងតម្រង់ទិស ស្តីពីការជ្រើសរើសសិក្ខាកាមសម្រាប់ចូលរួមវគ្គបណ្តុះបណ្តាល «បដិសណ្ឋារកិច្ចបៃតង (ហូកាបៃតង)» ព្រមទាំងការជ្រើសរើសបេក្ខភាពសហគ្រាស ដើម្បីចូលរួមប្រឡងប្រណាំងពានរង្វាន់សហគ្រាសបៃតង។ អង្គសិក្ខាសាលានេះស្ថិតក្រោមអធិបតីភាព លោក មុត ពិសិដ្ឋនា អភិបាលរងខេត្តប៉ៃលិន និង មានការចូលរួមពីលោក សាក់ សាវរិទ្ធ ប្រធានមន្ទីរបរិស្ថានខេត្តប៉ៃលិន មន្រ្តីជំនាញពាក់ព័ន្ធ តំណាងអង្គការដៃគូគម្រោងហូកាបៃតង អាជ្ញាធរក្រុង-ស្រុក ព្រមទាំងម្ចាស់អាជីវកម្ម និងតំណាងសហគ្រាសនានា ក្នុងមូលដ្ឋានខេត្តប៉ៃលិនជាច្រើនរូប។