(ប៉ៃលិន)៖ កម្លាំងនៃស្នងការដ្ឋាននគរបាលខេត្តប៉ៃលិន បានបន្តចុះល្បាត និងដាក់ពង្រាយកម្លាំងឈរជើងយ៉ាងសកម្ម ដើម្បីការពារសន្តិសុខ សណ្តាប់ធ្នាប់សាធារណៈ និងសម្រួលចរាចរណ៍នៅតាមគោលដៅសំខាន់ៗទូទាំងខេត្ត ក្នុងឱកាសពិធីបុណ្យភ្ជុំបិណ្ឌ នាថ្ងៃសៅរ៍ ១៤រោច ខែភទ្របទ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១០ ខែតុលា ឆ្នាំ២០២៦។

(ប៉ៃលិន) ៖ នៅព្រឹកថ្ងៃទី៩ ខែតុលា ឆ្នាំ២០២៦ លោកឧត្ដមសេនីយ៍ត្រី កែវ សុផល មេបញ្ជាការកងរាជអាវុធហត្ថខេត្តប៉ៃលិន បានដឹកនាំលោកមេបញ្ជាការរង ទទួលជំនាញ នាយសេនាធិការរង ប្រធានមន្ទីរទាំង៧ នាយលេខាធិការដ្ឋាន នាយការិយាល័យហិរញ្ញវត្ថុ និងនាយការិយាល័យអធិការកិច្ច ចូលរួមកិច្ចប្រជុំផ្សព្វផ្សាយរបាយការណ៍បូកសរុបលទ្ធផលការងារ ៩ខែ និងលើកទិសដៅការងារ ត្រីមាសទី៤ ឆ្នាំ២០២៦ តាមរយៈប្រព័ន្ធ video conferene ក្រោមអធិបតីភាពលោកឧត្ដមសេនីយ៍ទោ ស សំបូរធន មេបញ្ជាការរង និងជានាយសេនាធិការកងរាជអាវុធហត្ថលើផ្ទៃប្រទេស ។

ឯកឧត្តម អៀង វុធ និង មន្ត្រីរាជការ ព្រមទាំងពុទ្ធបរិស័ទជិតឆ្ងាយយ៉ាងច្រើនកុះករ បានអញ្ជើញចូលរួមក្នុងពិធីបុណ្យកាន់បិណ្ឌវេនទី១២ ពិធីរាប់បាត្រព្រះសង្ឃចំនួន ៥០អង្គ និងបុណ្យឆ្លងដាក់ព្រះនេត្រព្រះពុទ្ធបដិមា ព្រះអង្គធំ នៅវត្តប៉ៃលិនធម្មាអភិវឌ្ឍន៍ (ហៅវត្តអូររអិល) ស្ថិតក្នុងភូមិអូររអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន ដើម្បីឧទ្ទិសកុសលជូនបុព្វការីជន វីរកងទ័ព និងជាការចូលរួមទ្រទ្រង់ព្រះពុទ្ធសាសនា ដែលជាសាសនារបស់រដ្ឋ។

ក្នុងឱកាសរដូវកាលបុណ្យកាន់បិណ្ឌ និងភ្ជុំបិណ្ឌ ប្រពៃណីជាតិខ្មែរ ឯកឧត្តម សៅ សារ៉ាត់ អ្នកតំណាងរាស្ត្រមណ្ឌលប៉ៃលិន រួមដំណើរដោយ ឯកឧត្តម ទី សុខា បានអញ្ជើញចុះសួរសុខទុក្ខ និងនាំយកអំណោយមនុស្សធម៌ចែកជូនដល់ប្រជាពលរដ្ឋចាស់ជរា ចំនួន ២២ គ្រួសារ មកពីភូមិអូរឈើក្រំ និងភូមិបឹងអូរជាង ស្ថិតក្នុងឃុំស្ទឹងកាច់ ស្រុកសាលាក្រៅ ខេត្តប៉ៃលិន ដើម្បីជួយសម្រាលការលំបាកក្នុងជីវភាពរស់នៅប្រចាំថ្ងៃ។

(ប៉ៃលិន)៖ សេវាដឹកជញ្ជូនសាធារណៈឥតគិតថ្លៃរបស់រាជរដ្ឋាភិបាលកម្ពុជា តាមរយៈរដ្ឋបាលរាជធានីភ្នំពេញ តែងតែបន្តដាក់ឱ្យដំណើរការជារៀងរាល់ឆ្នាំក្នុងឱកាសពិធីបុណ្យជាតិធំៗ ដើម្បីឆ្លើយតបទៅនឹងតម្រូវការជាក់ស្តែង និងជួយសម្រាលបន្ទុកចំណាយរបស់បងប្អូនប្រជាពលរដ្ឋ និងកម្មករ-និយោជិត។ ជាក់ស្តែង ក្នុងថ្ងៃទី១ នៃការដាក់ឱ្យដំណើរការរថយន្ដក្រុងសាធារណៈ នាឱកាសពិធីបុណ្យភ្ជុំបិណ្ឌប្រពៃណីជាតិ នៅរសៀលថ្ងៃទី៩ ខែតុលា ឆ្នាំ២០២៦នេះ នៅបរិវេណខាងជើងសាលាខេត្តប៉ៃលិន សង្កេតឃើញមានប្រជាពលរដ្ឋយ៉ាងច្រើនកុះករ ទាំងកុមារ មនុស្សចាស់ ប្រុសស្រី បានមកជួបជុំរង់ចាំឡើងជិះរថយន្តក្រុង ដើម្បីធ្វើដំណើរទៅកាន់ស្រុកកំណើត និងបណ្តាខេត្តផ្សេងៗប្រកបដោយបរិយាកាសរីករាយ។

ដោយអនុវត្តនូវអនុសាសន៍ណែនាំដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងក្រោមការដឹកនាំបញ្ជាផ្ទាល់ពី លោកឧត្តមសេនីយ៍ទោ សេង សុគន្ធ ស្នងការ នៃស្នងការដ្ឋាននគរបាលខេត្តប៉ៃលិន កម្លាំងនគរបាលខេត្ត បានធ្វើការចុះល្បាតរក្សាសន្តិសុខ សណ្តាប់ធ្នាប់សាធារណៈ និងបង្ការទប់ស្កាត់បទល្មើសគ្រប់ប្រភេទ ព្រមទាំងបានដាក់កម្លាំងឈរជើងការពារ សម្រួលចរាចរណ៍ នៅតាមទីប្រជុំជន វត្តអារាម និងតំបន់រមណីយដ្ឋាននានា ក្នុងភូមិសាស្ត្រខេត្តប៉ៃលិន ក្នុងពិធីបុណ្យកាន់បិណ្ឌ-ភ្ជុំបិណ្ឌ ។