ក្នុងឱកាសដឹកនាំកិច្ចប្រជុំសាមញ្ញលើកទី២៩ របស់ក្រុមប្រឹក្សាខេត្តសៀមរាប អាណត្តិទី៤ នាថ្ងៃទី៦ ខែតុលា ឆ្នាំ២០២៦នេះ ឯកឧត្តម លី សំរិទ្ធ ប្រធានក្រុមប្រឹក្សាខេត្ត បានណែនាំដល់លោក អភិបាលក្រុង ស្រុកធ្វើការពិនិត្យការងារគ្រោះមហន្តរាយបន្ទាប់ពីទឹកបានស្រក និងត្រូវវាយតម្លៃនៃការខូចខាតហេដ្ឋារចនាសម្ព័ន្ធ សាលារៀន និងដំណាំផ្សេង ពិសេសដំណាំស្រូវ។

នៅព្រឹកថ្ងៃទី៦ ខែតុលា ឆ្នាំ២០២៦នេះ ព្រះចៅអធិការ ព្រះសង្ឃ ពុទ្ធបរិស័ទ និងសប្បុរសជនជាច្រើនរូប បានរួមគ្នារៀបចំពិធីអភិសេកព្រះពុទ្ធបដិមាធ្វើអំពីស្ពាន់មួយអង្គ ដែលជាសទ្ធាជ្រះថ្លារបស់ មហាឧបាសិកា ស៊ិន លំអង ព្រមទាំងកូនចៅ និងក្រុមគ្រួសារ ដើម្បីឧទ្ទិសថ្វាយជាពុទ្ធបូជា និងរួមចំណែកលើកស្ទួយវិស័យព្រះពុទ្ធសាសនា នៅវត្តបារាយមហានទីរតនារាម ហៅវត្តស្វាយរមៀត ក្នុងសង្កាត់ទឹកវិល ក្រុងសៀមរាប។

នៅព្រឹកថ្ងៃទី៦ ខែតុលា ឆ្នាំ២០២៦នេះ ឯកឧត្តម នាយឧត្តមសេនីយ៍ ឃឹម ប៊ុនសុង រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានដឹកនាំប្រតិភូ អញ្ជើញសួរសុខទុក្ខ និងផ្ដល់អំណោយជូនដល់បងប្អូនយោធិនពិការចំនួន ២៧០គ្រួសារ នៅមជ្ឈមណ្ឌលអភិវឌ្ឍយោធិនពិការ សម្ដេចតេជោ ហ៊ុន សែន គូលែន៣១៧ ខេត្តសៀមរាប ក្នុងឱកាសបុណ្យភ្ជុំបិណ្ឌ ដោយមានការចូលរួមពី លោក ព្រឹម រដ្ឋា អភិបាលរងខេត្ត ផងដែរ។

នៅថ្ងៃទី៦ ខែតុលា ឆ្នាំ២០២៦នេះ រដ្ឋបាលខេត្តសៀមរាប បានចុះផ្សព្វផ្សាយអំពីបែបបទ នីតិវិធីនៃការទទួល និងផ្ដល់សេវារដ្ឋបាល នៅអង្គភាពច្រកចេញចូលតែមួយ នៃរដ្ឋបាលខេត្ត និងបង្ហាញពីការប្រើប្រាស់កម្មវិធីព័ត៌មានវិទ្យា សម្រាប់ទទួលពាក្យស្នើសុំ និងផ្ដល់សេវារដ្ឋបាលតាមប្រព័ន្ធអនឡាញ នៅអង្គភាពច្រកចេញចូលតែមួយខេត្ត ជូនសិស្សនិស្សិតនៅសាកលវិទ្យាល័យ ឯកទេស នៃកម្ពុជា (CUS) សាខាខេត្តសៀមរាប។

នៅព្រឹកថ្ងៃទី៦ ខែតុលា ឆ្នាំ២០២៦នេះ ក្រុមប្រឹក្សាសកម្មភាពជនពិការខេត្តសៀមរាប បានបើកិច្ចប្រជុំប្រចាំត្រីមាសទី៣ ឆ្នាំ២០២៦ ដើម្បីពិនិត្យ និងវាយតម្លៃវឌ្ឍនភាព នៃការអនុវត្តការងារពាក់ព័ន្ធនឹងវិស័យពិការភាព ពិភាក្សាលើបញ្ហាប្រឈម និងកំណត់ទិសដៅការងារសម្រាប់អនុវត្តបន្តឱ្យកាន់តែមានប្រសិទ្ធភាព និងបន្តពង្រឹងកិច្ចសហការក្នុងការលើកកម្ពស់ សិទ្ធិសុខុមាលភាព និងការចូលរួមរបស់ជនមានពិការភាពក្នុងសង្គម។

‎ក្នុងឱកាសដឹកនាំកិច្ចប្រជុំបូកសរុបលទ្ធផលការងាររយៈពេល ៩ខែ របស់ក្រុមការងាររាជរដ្ឋាភិបាលចុះមូលដ្ឋានស្រុកអង្គរធំ នារសៀលថ្ងៃទី៥ ខែតុលា ឆ្នាំ២០២៦ ឯកឧត្តម ឃុន វុធ បានណែនាំដល់ក្រុមការងារ និងអាជ្ញាធរមានសមត្ថកិច្ចពាក់ព័ន្ធ ឱ្យបន្តយកចិត្តទុកដាក់ធ្វើបច្ចុប្បន្នភាពទិន្នន័យប្រជាពលរដ្ឋក្នុងមូលដ្ឋាន ពិសេសផ្តោតលើអ្នកដែលគ្រប់អាយុត្រូវធ្វើអត្តសញ្ញាណបណ្ណសញ្ជាតិខ្មែរ និងអ្នកដែលអត្តសញ្ញាណបណ្ណហួសសុពលភាព។ ការធ្វើបែបនេះ គឺដើម្បីសម្រួលដល់ប្រជាពលរដ្ឋក្នុងការទទួលបានឯកសារផ្លូវច្បាប់ និងធានាបាននូវភាពត្រឹមត្រូវនៃទិន្នន័យ សម្រាប់សម្រួលដល់ការគ្រប់គ្រងរដ្ឋបាលក្នុងមូលដ្ឋានឱ្យកាន់តែមានប្រសិទ្ធភាព។