ព័ត៌មានក្នុងខេត្ត

(ប៉ៃលិន)៖ នៅថ្ងៃទី២៨ ខែសីហា ឆ្នាំ២០២៦ លោក ខៀវ សុថុន ប្រធានការិយាល័យផលិតកម្ម និងបសុព្យាបាល នៃមន្ទីរកសិកម្ម រុក្ខាប្រមាញ់ និងនេសាទខេត្ត បានដឹកនាំក្រុមការងារ ចុះអនុវត្តការចាក់វ៉ាក់សាំងការពារជំងឺសារទឹកគោ ស្ថិតក្នុងភូមិភ្នំក្រិញ ឃុំស្ទឹងត្រង់ ស្រុកសាលាក្រៅ ក្រោមការចង្អុលបង្ហាញពីលោក សាយ សុផាត ប្រធានមន្ទីរកសិកម្ម រុក្ខាប្រមាញ់ និងនេសាទខេត្តប៉ៃលិន ក្នុងគោលបំណងដើម្បីបង្ការ ទប់ស្កាត់ និងព្យាបាលជំងឺសត្វនៅមូលដ្ឋាន ឱ្យបានទាន់ពេលវេលា កាត់បន្ថយហានិភ័យ នៃការកើត និងការរីករាលដាលជំងឺសត្វ។

ប៉ៃលិន៖ មន្ត្រីជំនាញ នៃមន្ទីរកសិកម្ម រុក្ខាប្រមាញ់ និងនេសាទខេត្តប៉ៃលិន បានចុះពិនិត្យ វាយតម្លៃ និងចាត់វិធានការអន្តរាគមន៍ជាបន្ទាន់ ដោយផ្តល់ថ្នាំកសិកម្ម និងណែនាំបច្ចេកទេសកម្ចាត់ដង្កូវហ្វូងប្រភេទថ្មី ដែលកំពុងស៊ីបំផ្លាញដំណាំពោតក្រហមរបស់ប្រជាកសិករចំនួន ២៨គ្រួសារ លើផ្ទៃដីប្រមាណ ៣៥ហិកតា ក្នុងភូមិឡាក់ហុកពី ឃុំស្ទឹងកាច់ ស្រុកសាលាក្រៅ ខេត្តប៉ៃលិន។

លោកជំទាវបណ្ឌិត បាន ស្រីមុំ អភិបាលនៃគណៈអភិបាលខេត្តប៉ៃលិន បានអញ្ជើញដឹកនាំមន្ត្រីជំនាញ និងក្រុមការងារ ចុះពិនិត្យមើលដោយផ្ទាល់ ការបង្ករបង្កើនផលដំណាំបន្លែ ក្នុងខេត្តប៉ៃលិន ព្រមទាំងលើកទឹកចិត្តដល់ប្រជាកសិករធ្វើការផលិតឱ្យបានច្រើន ដើម្បីផ្គត់ផ្គង់ទីផ្សារក្នុងស្រុក និងនាំចេញ ដែលធានាបាននូវតម្លៃសមរម្យ និងគុណភាព តាមបែបធម្មជាតិ ប្រកបដោយទំនុកចិត្ត មិនប៉ៈពាល់ដល់សុខភាព។

ខេត្តប៉ៃលិន៖ នារសៀលថ្ងៃទី១៥ ខែសីហា ឆ្នាំ២០២៦ ឯកឧត្តមទេសរដ្ឋមន្ត្រី អ៊ី ឈាន ប្រធានក្រុមការងាររាជរដ្ឋាភិបាលចុះមូលដ្ឋានខេត្តប៉ៃលិន រួមជាមួយលោកជំទាវបណ្ឌិត បាន ស្រីមុំ អភិបាលនៃគណៈអភិបាលខេត្តប៉ៃលិន និងឯកឧត្តម សៅ សារ៉ាត់ អ្នកតំណាងរាស្ត្រមណ្ឌលប៉ៃលិន ព្រមទាំងក្រុមការងារអមដំណើរ បានអញ្ជើញចុះពិនិត្យមើលភោគផលដំណាំមៀនប៉ៃលិន របស់ប្រជាកសិករនៅភូមិទំនប់ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ដើម្បីវាយតម្លៃស្ថានភាពផលដំណាំផ្ទាល់ និងជំរុញការបន្តពង្រឹងខ្សែច្រវាក់ផលិតកម្ម ខណៈដំណាំមៀនប៉ៃលិននាពេលបច្ចុប្បន្នកំពុងទទួលបានទីផ្សារល្អ និងមានតម្រូវការខ្ពស់។

ប៉ៃលិន៖ នៅថ្ងៃទី១០ ខែសីហា ឆ្នាំ២០២៦ លោក សាយ សុផាត ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តប៉ៃលិន បានសហការជាមួយលោក ង៉ា លីហុង ប្រធានមន្ទីរធនធានទឹក និងឧតុនិយម ខេត្តប៉ៃលិន ព្រមទាំងមន្ត្រីជំនាញ បានចុះពិនិត្យផ្ទាល់ដល់ផលិតកម្មដំណាំស្រូវ និងវាយតម្លៃស្ថានភាពផលប៉ះពាល់ដោយសារគ្រោះរាំងស្ងួត លើដំណាំស្រូវរដូវវស្សារបស់ប្រជាកសិករ ស្ថិតនៅក្នុងឃុំស្ទឹងត្រង់។

(ប៉ៃលិន)៖ លោកជំទាវ បាន ស្រីមុំ អភិបាលនៃគណៈអភិបាលខេត្តប៉ៃលិន បានមានប្រសាសន៍ថា មន្ទីរកសិកម្ម រុក្ខាប្រមាញ់ និងនេសាទ ជាពិសេសផ្នែកជលផល ត្រូវពិនិត្យជ្រើសរើសពូជត្រីដែលត្រូវលែង ឱ្យជាពូជដែលអាចបន្សាំនឹងស្ថានភាពទឹកស្ទឹងដែលមានចរន្តហូរបាន ព្រោះប្រភេទត្រីខ្លះមិនអាចរស់នៅ និងបន្តពូជក្នុងទឹកស្ទឹងបានទេ។ ម្យ៉ាងទៀត ខេត្តប៉ៃលិនជាតំបន់ខ្ពង់រាប ដែលមានតែស្ទឹង អូរ និងប្រឡាយ មិនមានបឹង ឬទន្លេធម្មជាតិ សម្រាប់ឱ្យត្រីគ្រប់ប្រភេទធ្វើជាជម្រក និងពងកូននោះទេ។

ពិធីលែងកូនត្រីនេះ ដើម្បីអបអរសាទរទិវាមច្ឆជាតិ១កក្កដា ២០២៦ ក្នុងគោលបំណងបំផុសស្មារតីប្រជាពលរដ្ឋ ចូលរួមចំណែកការពារ និងអភិរក្សធនធានជលផល។ កម្មវីធីនេះនឹងប្រព្រឹត្តទៅនៅថ្ងៃទី៣១ ខែកក្កដា ឆ្នាំ២០២៦ នៅទីតាំងការពារ និងអភិរក្សជលផល ស្ថិតក្នុងភូមិភ្នំកុយ ឃុំសាលាក្រៅ ស្រុក សាលាក្រៅ ខេត្តប៉ៃលិន ក្រោមវត្តមានលោកជំទាវ អភិបាល នៃគណៈអភិបាលខេត្ត នាវេលាម៉ោង ៨.០០នាទីព្រឹក ។

មានប្រសាសន៍ក្នុងពេលប្រមូលផលសណ្តែកបាយចំនួន ៥ហិចតា នៅក្នុងភូមិសួនអំពៅកើត សង្កាត់ប៉ៃលិនក្រុងប៉ៃលិន ខេត្តប៉ៃលិន នារសៀលថ្ងៃតិ១៨ ខែកក្កដា ឆ្នាំ២០២៦ បងប្រុស អ៊ឹង ស៊ីថាល់ បានសម្តែងការរីករាយចំពោះផលដំណាំ សណ្តែកបាយរបស់គាត់ ដែលកំពុងតែប្រមូលផលដោយម៉ាស៊ីនច្រូត របស់ ពូប្រុសត្រូល។

ប៉ៃលិន៖ បន្ទាប់ពីធ្វើចំណាកស្រុកទៅធ្វើការនៅប្រទេសថៃអស់រយៈពេលជាច្រើនឆ្នាំ និងបានវិលត្រឡប់មកកាន់មាតុប្រទេសវិញកាលពីពេលកន្លងទៅនេះ មានបងប្អូនប្រជាពលករជាច្រើនបានចាប់យកមុខរបរនៅតាមក្រុមហ៊ុន រោងចក្រនានានៅក្នុងប្រទេស ក្រោមការជ្រោមជ្រែងពីក្រសួងការងារ និងបណ្តុះបណ្តាលវិជ្ជាជីវៈ មន្ទីរការងារ និងបណ្តុះបណ្តាលវិជ្ជាជីវៈ និងអាជ្ញាធរមូលដ្ឋានផងដែរ។ ប៉ុន្តែ ក៏មានបងប្អូនប្រជាពលករមួយចំនួន បានចាប់យកការប្រកបរបរផ្ទាល់ខ្លួនជាមួយក្រុមគ្រួសារផងដែរ ដើម្បីទ្រទ្រង់ជីវភាពគ្រួសារអោយប្រសើឡើង។

ដំណាំសង្រ្កងស្វា ត្រូវបានអ្នកជំនាញផ្នែកកសិកម្ម នៃមន្ទីរកសិកម្ម រុក្ខាប្រម៉ាញ់ និង នេសាទ ខេត្តប៉ៃលិន ណែនាំអោយប្រជាកសិករយកទៅដាំ ដើម្បីកែប្រែគុណភាពដីរបស់ខ្លួនអោយបានល្អឡើង វិញ បន្ទាប់ពីការធ្វើកសិកម្មអស់រយៈពេលច្រើនឆ្នាំ ធ្វើអោយដីហូច្រោះ សិករិករឹល ខ្សោះជីវជាតិ ផលដំណាំធ្លាក់ចុះពីមួយឆ្នាំទៅមួយឆ្នាំ និងត្រូវចំណាយច្រើន លើជី ថ្នាំកសិកម្ម ដែលបានផ្តល់ផលប៉ះពាល់ដល់ចំណូលគ្រួសាររបស់ប្រជាកសិករយើង។

លោក ម៉ិច ចាន់នី ប្រជាពលរដ្ឋរស់នៅក្នុងភូមិស្ទឹងកាច់ ឃុំស្ទឹងកាច់ ស្រុកសាលាក្រៅ ខេត្តប៉ៃលិន បានសំដែងការរីករាយក្នុងការចិញ្ចឹមមាន់ជាលក្ខណៈគ្រួសារ ដោយសារគាត់រកបានប្រាក់ចំណូលសមរម្យសម្រាប់ផ្គត់ផ្គត់ជីវភាពគ្រួសារ ។

បងស្រី កេត វ៉ាន់ណៃ កសិករបណ្តុះផ្សឹតរស់នៅក្នុងភូមិវត្ត សង្កាត់ប៉ៃលិនក្រុងប៉ៃលិន ខេត្តប៉ៃលិន មានសេចក្តីរីករាយចំពោះផលិតផលផ្សឹតរបស់គាត់ ដោយសារការងារបណ្តុះផ្សឹតទទួលបាលទិន្នផលខ្ពស់ និងមានតម្លៃសមរម្យនៅលើទីផ្សារ។ ជារៀងរាល់ម៉ោង៤ព្រឹក បងស្រីក្រោកពីដំនេក រួចចុះទៅកាន់រោងបណ្តុះផ្សឹត ដើម្បីប្រមូលផលផ្សឹត( ផ្សឹតស ឬផ្សឹតអំពោះ) គាត់ចិតសម្អាតគល់ផ្សឹងអោយស្អាត រួចវិចខ្ចប់ និងដឹកយកទៅដាក់អោយម៉ូយនៅផ្សារប៉ាហ៊ី ក្នុងតម្លៃ ៦០០០រៀល ក្នុងមួយគីឡូក្រាម។ ក្នុងកញ្ចប់ផ្សឹតប្រហែល ៣០០០កញ្ចប់ បងស្រី គេត វ៉ាន់ណៃ អាចប្រមូលផលផ្សឹតបានប្រហែល ១០គីឡូក្រាម ជាមធ្យម ជារៀងរាល់ថ្ងៃ ។